Klikkaðar kjötbollur

Fyrir nokkru síðan fann ég uppskriftasíðu hjá stelpu í Hollandi sem heitir Kay. Hún er snillingur í eldhúsinu og gerir bara góðan mat.
Þetta er uppáhalds kjötbolluuppskriftin mín og deili ég henni hér með ykkur.
Myndir og upprunalegu uppskriftina má sjá hér á síðu Kay.

Bollurnar:

• 500 gr. nautahakk
• 1 shallot laukur
• 1/3 paprika 
• 1 hvítlauksrif
• 1 chilli pipar
• 1 tsk oregano
• 1/2 tsk paprikukrydd
• 1/4 tsk kanill
• 1/2 tsk karrý
• 2 tsk þurrkuð steinselja eða 1 msk af ferskri
• 1 tsk salt
• 1 egg
• 3 msk fetaostur (sigtið olíuna frá)
• 4 msk brauðmylsna

Saxið laukinn, hvítlaukinn, paprikuna og chillíið mjög fínt. Skellið öllum innihaldsefnunum í hrærivél (eða ef þið eruð ógeðslega sterk, þá getið þið hrært með höndunum!) og blandið saman í smá stund.

Mótið 4-6 stórar bollur úr kjötdeiginu og brúnið létt á pönnu.
Setjið í eldfast mót og passið að hafa það ágætlega stórt því sósan á eftir að koma yfir.


Sósan:

• 1 msk olía
• 1 shallot laukur
• 1 tsk oregano
• 1/4 tsk kanill
• 1 dós niðursoðnir tómatar (best að hafa þá diced eða mauka þá með töfrasprota)
• 1/3 bolli vatn

Glærið laukinn í olíunni (ég set smá hvítlauk hér líka, en ég elska hvítlauk!), takið af hitanum og setjið kryddið út í. Hrærið vel saman.
Hrærið tómötunum og vatninu út í og látið suðuna koma upp.
Hellið yfir kjötbollurnar og skellið í ofninn á 200°c í svona 30 mínútur.

Ég ber þær fram með spaghettí, kartöflum eða hrísgrjónum og það er allt jafn gott.